ҒАЛЫМ МАРАТ БЕКБОСЫНОВТЫҢ 20 КІТАБЫНЫҢ ТҰСАУЫ КЕСІЛДІ

Бүгін әдебиеттанушы ғалым, академик С.Қирабаев атындағы Қазақ әдебиеті және оқыту әдістемесі кафедрасының доценті Марат Бекбосыновтың авторлығымен шыққан 20 кітаптың таныстырылымы болып өтті. Ғылыми-зерттеу еңбектерінің тұсауы «Абайтану және қазақ әдеби мұрасындағы тарихи сабақтастық» атты жиында салтанатты түрде кесілді. Оған еліміздің жетекші ғалымдары, абайтанушылар, Марат Бекбосыновтың шәкірттері мен студенттер қатысты.

Баққосудың мақсаты – Марат Нұрғазыұлының зерттеу еңбектеріндегі ғылыми тұжырымдарды кеңінен таныстыра отырып, Абай мұрасы мен ұлттық әдебиет арасындағы тарихи-рухани байланысты жаңаша пайымдау. Ұлы хәкімнің шығармаларын зерделеудегі ұстанымдар туралы кеңінен ой қозғау. Жиынды ашқан Зерттеу қызметі және инновация жөніндегі проректоры Ертай Сұлтан ұлттық руханиятты дамытудағы Абай мұрасын зерттеудің маңызына тоқталды. 

– Бұл ұлттық гуманитарлық ғылымдарды маңызды ғылымдардың бірі саналатын, абайтанудың жаңа белесін айқындайтын, терең мазмұнды зерттеулерді қауымға ұсынатын ерекше сәт. ХХI ғасырдағы мәдени-рухани жаңғыру жағдайында Абай мұрасын ғылыми тұрғыдан зерделеу, оның философиялық, этикалық және эстетикалық қырларын жүйелі талдау қазақ әдебиетінің болашағын айқындайтын өзекті міндеттердің бірі», – деді проректор.

Іс-шара барысында тұсауы кесілген Марат Бекбосынов кітаптарының 70 пайызы ұлы ойшыл Абай Құнанбайұлының мұрасына арналған. Кітап таныстырылымында сөз сөйлеген Филология факультетінің деканы Алуа Таңжарықова, профессорлар-ғалымдар Балтабай Әбдіғазиұлы, Серік Асылбекұлы, Серікқазы Сыбанұлы т.б. Марат Нұрғазыұлы еңбектерінің өзектілігін ерекше атап, туындылардың мазмұнын жан-жақты ашып берді. 

– Марат Бекбосыновтың кітаптарының ішіндегі көптомдық еңбектерінің өзектілігі бірнеше маңызды аспектілермен айшықталады. Біріншіден, тарих пен әдебиеттегі олқылықтың орнын толтыру, екіншіден, көптомдыққа енген зерттеулердің дені азаттық күрес идеясы аясында қарастырылған. Үшіншіден, зерттеулерде отаршылдық жүйеге наразылық шығармаларының көркемдік ерекшеліктері талданып, өз қарсылықтарын білдіру үшін ақындар қолданған айшықты тілдік өрнектерге назар аударылған. Төртіншіден, еңбектерде тың теориялық құрылымдар қолданылған», – деді абайтанушы Серікқазы Сыбанұлы.

65 жасты алқымдаған Марат Бекбосынов 20 кітапқа тұтас ғұмырын арнағанын жеткізді. Әріптестері ғылыми-педагогикалық жылдарында бар уақытын Абай шығармаларын зерттеп, шәкірт тәрбиелеуге сарп етіп келе жатқан ғалымның иығына шапан жауып, сый-сияпат жасап, шынайы ілтипаттарын білдірді.

Абай атындағы ҚазҰПУ

Баспасөз қызметі