Химия кафедрасында Урбана-Шампейндегі Иллинойс университетінің (АҚШ) профессоры Александр Мироненко дәріс өткізді

2025 жылдың 31 қазанында Абай атындағы Қазақ ұлттық педагогикалық университетінің химия кафедрасында Урбана-Шампейндегі Иллинойс университеті (АҚШ), Химиялық және биомолекулалық инженерия кафедрасының профессоры Александр Мироненко дәріс оқыды. Дәріс «Жетілдірілген кванттық модельдерді қолдана отырып, катализдегі беттік конфигурациялар мен реакция механизмдерін ашу» тақырыбында өткізілді.

Дәріске магистранттар мен докторанттар және химия кафедрасының профессор-оқытушылар құрамы қатысты. Профессор Александр Мироненко химиялық байланыстардың түзілуі мен үзілуінің әртүрлі аспектілері, кванттық әдістер, эмпирикалық атомаралық потенциалдар, беттік каталитикалық әсерлер, катализ процесі, алкандардың және алкендердің реакциялары, сонымен қатар цеолит кеуектеріндегі оқшаулау мен еріткіш әсерлерінің өзара әрекеттесуі жайлы ақпарат берді.

Дәрісте химия өнеркәсібі үшін катализатордың маңыздылығы көрсетіліп, гомогенді және гетерогенді катализатор арасындағы байланыстар, олардың механизмдерін есептеуге арналған эмпирикалық кванттық модельдер талқыланды. Профессор Александр Мироненко кванттық химиялық есептеулердің түрлі жолдарын түсіндіріп, компьютерлік бағдарламасымен таныстырды.

Дәріс соңында қатысушылар профессормен сұрақ жауап алмасып, ашық талқылау өткізді.