Абай университетінің студенттері қос дипломды оқу бағдарламасынан кейін Польшадан оралды

2024-2025 оқу жылының басында орыс тілі мен әдебиеті кафедрасының «Орыс тілі мен әдебиеті» және «Орыс тілінде оқытпайтын мектептердегі орыс тілі мен әдебиеті» мамандықтарының 2 және 3 курс студенттері қос диплом бағдарламасы аясында Польшадағы Поморск университетіне (Слупск қ.) оқуға аттанған болатын. Жақында олар оқу бағдарламасының кезекті кезеңін сәтті аяқтап, Қазақстанға оралды.

Абай атындағы Қазақ ұлттық педагогикалық университеті мен Поморск университеті арасындағы әріптестік 2017 жылдан бері қарқынды дамып келеді. Осы уақыт ішінде 15-тен астам студент еуропалық үлгідегі диплом алып, жаңа академиялық және кәсіби мүмкіндіктерге қол жеткізді.

3-курс студенттері Польшада толық оқу бағдарламасын (3 семестр) аяқтап, енді дипломдық жұмыстарын қорғауға дайындалуда. Ал 2-курс студенттері оқудың алғашқы семестрін тәмамдап, университет әкімшілігіне, Халықаралық ынтымақтастық департаментіне және оқытушыларға оқу процесін ұйымдастырудағы қолдауы үшін алғыс білдірді.

Поморск университетіндегі дәрістерден бөлек, студенттер Абай атындағы Қазақ мәдениеті және ғылым орталығы ұйымдастырған іс-шараларға белсенді қатысып, басқа қалалар мен елдерге оқу сапарларына да шықты.

Қос диплом бағдарламасына қалай түсуге болады?

Сәуір айынан бастап студенттер бағдарламаға қатысу үшін құжаттарын дайындай алады. Жақын арада кафедра жоғары курс студенттерімен бірлесіп, бірінші курс студенттеріне бағдарламаның артықшылықтары мен талаптарын түсіндіру мақсатында ашық дәріс өткізеді. Кездесу барысында екі университеттегі оқу процесінің ерекшеліктері, академиялық талаптар, сапарға дайындық және қаржылық мәселелер жайлы толық ақпарат беріледі.

Сонымен қатар, қос диплом бағдарламасы студенттерге осы оқу форматын өз бетінше таңдауға мүмкіндік беретін мамандықтардың білім беру бағдарламасына енгізілген.

Қос диплом бағдарламасы - екі елде сапалы білім алуға, халықаралық деңгейдегі диплом иеленуге және болашақ мансаптық мүмкіндіктерді кеңейтуге жол ашатын бірегей мүмкіндік.