Наурыз – бейбітшілік пен мейірімділік мерекесі

2025 жылдың 17 наурызында, Шаңырақ күні аясында Түркменстан студенттерінің қатысуымен Абай атындағы ҚазҰПУ «Орыс тілі мен әдебиеті» және «Орыс тілінде оқытпайтын мектептердегі орыс тілі мен әдебиеті» мамандықтары 101 тобы «Наурыз - праздник мира и добра» (Наурыз - бейбітшілік пен мейірімділік мерекесі) тақырыбында шығыс халықтарының салт-дәстүрлерін дәріптеу мақсатында іс-шара  ұйымдастырып өткізді.

Топ студенттері түркмен және қазақ ұлттық киімдерін киіп, іс-шараны әдеби-музыкалдық композициямен қазақ тілінде сәлемдесумен бастады. Сондай-ақ орыс тілінде Наурыз туралы өлеңдер жатқа оқып, үш тілде: қазақ, түркмен және орыс тілдерінде құттықтаулар айтты.

Іс-шараның қадірлі қонақтары ретінде Академиялық мәселелер жөніндегі департамент директоры Хайрулла Жанбеков, Филология факультетінің деканы Алуа Таңжарықова, деканның оқу ісі жөніндегі орынбасары Гүлназ Нүптекеева, орыс тілі мен әдебиеті кафедрасының меңгерушісі, профессор Сәуле Әбішева мен кафедра оқытушылары арнайы шақырылды. Аталған басқосу той жиынды Сәуле Әбішева құттықтау тілектерімен ашты.

Қыдыр ата рөлінде Дұрдымұхаммед Жұмаев қазақ-түркмен тілдерінде бата беріп, қонақтарды Наурыз мейрамымен құттықтады. Думанды іс-шара барысында қазақ топтарының студент қыздары домбыра және қобыз аспаптарымен күй орындады. Түркмен студенттерімен орындалған «Ватан» («Отан») әні нағыз патриоттық әсер қалдырды. Мерекелік шара қатысушыларға тамаша көңіл-күй сыйлады.