Абай университеті: 11 ғалым «Болашақ» халықаралық бағдарламасы «500 ғалым» жобасының стипендиаты атанды

Абай университетінің ғалымдары «Болашақ» халықаралық бағдарламалар орталығының конкурстық іріктеуінен сәтті өтті. Конкурс нәтижесінде университетіміздің 11 оқытушысы: Гулнур Байшукурова, Жанакуль Саметова, Акерке Иргебаева, Жаксылык Оралканова, Айсаним Сарсенбаева, Галия Абаева, Калампыр Жумагулова, Бакитгуль Жумагулова, Жанар Ибраимова, Динмухаммед Турганбеков, Құралай Тұрлыханқызы «Болашақ» халықаралық бағдарламасы «500 ғалым» жобасының стипендиаттары атанды.

Мемлекет басшысы Қасым-Жомарт Тоқаевтың 2020 жылғы 1 қыркүйектегі «Жаңа жағдайдағы Қазақстан: іс-қимыл кезеңі» Жолдауында Қазақстан Республикасы Үкіметінің ғылымды дамыту жөніндегі тапсырмасына сәйкес жыл сайын еліміздің 500 ғалымы шетелде тағылымдамадан өтетіні атап өтілді.

Шетелде кадрлар даярлау жөніндегі республикалық комиссияның шешімімен Абай университетінің 11 ғалымы «500 ғалым» жобасы аясында шетелдің жетекші жоғары оқу орындары мен ғылыми-өндірістік орталықтарында ғылыми тағылымдамадан өтетін болады.