Академиялық мәтін жазу әдістемесіне арналған шеберлік сабағы өткізілді

2025 жылғы 14 мамырда Абай атындағы Қазақ Ұлттық педагогикалық университетінде «Академиялық мәтін жазу шеберханасы» атты әдістемелік нұсқаулықтың ресми таныстырылымы өтті. Іс-шараны «Қазақстандық қоғамдық даму институты» КеАҚ пен Абай атындағы ҚазҰПУ бірлесе ұйымдастырды.

Шараның басты мақсаты - академиялық мәтін жазу мәдениетін қалыптастыруға бағытталған бұл құралды ғылыми ортаға кеңінен таныстырып, тәжірибе алмасуға мүмкіндік жасау . Шараны университеттің аппарат басшысы Жанатбек Ішпекбаев ашып, нұсқаулықтың өзектілігі мен маңызын атап өтті.

Іс-шара барысында «Қазақстандық қоғамдық даму институты» КеАҚ-ның басқарма төрағасы Нұрбек Матжани сөз сөйлеп, нұсқаулықтың мазмұнына, оның білім және ғылым саласына қосар үлесіне жан-жақты тоқталды.

Шара соңында кітап авторларының бірі, тәжірибелі маман Назгүл Қожабек шеберлік сағатын өткізіп, қатысушыларға академиялық мәтін жазудың өзекті мәселелері, құрылымдық ерекшеліктері мен тиімді әдіс-тәсілдері жөнінде тәжірибелік тұрғыдан пайдалы ақпарат ұсынды.