Түлектер 35 жылдан соң ҚазҰПУ-да бас қосты

2025 жылғы 28 маусымда Абай атындағы Қазақ ұлттық педагогикалық университетін 30-35 жыл бұрын бітірген түлектердің кездесуі өтті.

Іс-шараны академиялық қызмет жөніндегі проректор Бану Нарбекова кіріспе сөзімен ашып, 30-35 жылдық кездесуге жиналған түлектерге Басқарма төрағасы-ректор Болат Тілептің құттықтауын жеткізді.

Салтанатты жиынға арнайы келген Алматы қаласының білім саласында сапаны қамтамасыз ету департаментінің бастығы Гүлнар Өмірбекқызы Қазақстан Республикасының Оқу-ағарту министрі Ғани Бейсембаевтың құттықтау хатын оқыды.

Сондай-ақ түлектер арасынан қоғам қайраткері, үздік өлкетанушы, ардақты ана, көркемсөз шебері Зәуреш Демеуқұлова ұстаздарға алғыс білдірді.

Түлектер қауымдастығының жетекшісі - Болатбек Нұрбатыров салтанатты жиынға келген барлық түлекті қауымдастықтың мүшесі ретінде қабылдап, арнайы сертификаттар мен төс белгілер табыстады.

Іс-шара барысында түлектер «Abai Endowment Fund» Корпоративтік қорының мақсаттарымен танысып, қорды қолдауға және көмек көрсетуге ниет білдірді.