ҚазҰПУ-да Анкара әлеуметтік ғылымдар университетінің өкілдерімен кездесу өтті

2025 жылғы 7 тамызда Абай атындағы Қазақ ұлттық педагогикалық университетінде Анкара әлеуметтік ғылымдар университетінің делегациясымен ресми кездесу өтті.

Қонақтар қатарында Анкара әлеуметтік ғылымдар университетінің ректоры Мұса Казым Арыжан, Ректор аппаратының басшысы Сердар Чалымлы, Қожа Ахмет Ясауи атындағы Халықаралық қазақ-түрік университеті Еуразия ғылыми-зерттеу институтының директоры Суат Бейлур және ғылыми қызметкер Еркінбек Тұрғынов болды.

Абай университеті тарапынан кездесуге университеттің стратегия және интернационалдандыру жөніндегі проректоры Айгүл Искакова, зерттеу қызметі және инновация жөніндегі проректор Ертай Сұлтан, халықаралық жобалар мен ынтымақтастық бөлімінің басшысы Әйгерім Тавылдиева және академиялық ұтқырлық бөлімінің басшысы Есім Мерей қатысты.

Кездесу аясында қос университет өз оқу орындарының ғылыми-инновациялық әлеуеті мен халықаралық байланыстарын таныстыратын бейнероликтерді ұсынды. Әр тарап та білім мен ғылымға басымдық беретінін, зерттеу университеті ретіндегі жетістіктерін, ғылыми жобаларын және халықаралық серіктестіктерін ерекше атап өтті.

Талқылау барысында білім мен ғылым саласындағы ынтымақтастықты дамыту, бірлескен ғылыми-зерттеу жобаларын жүзеге асыру, академиялық ұтқырлық пен тәжірибе алмасуды жандандыру мәселелері кеңінен қарастырылды.

Айгүл Искакова ҚазҰПУ-дың даму стратегиясында ғылымға айрықша көңіл бөлінетінін атап өтсе, Ертай Сұлтан ректордың бастамасымен жүзеге асырылып жатқан халықаралық жобаларға Анкара университеті де атсалыса алатынын жеткізді.

Кездесу соңында тараптар естелік сыйлықтармен алмасты. Абай университеті қонақтарға ұлы ойшылдың бейнесі бейнеленген арнайы сувенир тарту етсе, түркиялық делегация университетке өздерінің ғылыми және танымдық басылымдарын сыйға тартты.