Абай атындағы ҚазҰПУ-де Білім күні мен Ахмет Байтұрсынұлы атындағы дәрісхананың ашылуы өтті

2025 жылғы 2 қыркүйекте Абай атындағы Қазақ ұлттық педагогикалық университетінде жаңа оқу жылының басталуына орай дәстүрлі «Білім күні» мерекесіне арналған салтанатты іс-шара өтті.

Жиынды университеттің Басқарма төрағасы - ректор Болат Тілеп ашып, студенттер мен оқытушылар құрамын құттықтады. Ол білім алушыларға сәттілік тілеп, еліміздің болашағы жастарға сенім білдірді. Шараға университет ардагерлері де қатысып, жүрекжарды тілектерін жеткізді. Ардагерлер кеңесінің төрағасы Берікжан Айтқұлұлы бірінші курс студенттеріне ақ батасын берді.

Іс-шара аясында Алматы қаласы Медеу ауданы әкімдігінің бастамасымен жүзеге асып келе жатқан «Мектепке жол» республикалық акциясы жалғасын тапты. Университет ректоры Болат Тілептің ұсынысымен және кәсіподақ ұйымының қолдауымен аудан мектептерінің оқушыларына оқу құрал-жабдықтары табысталды. Салтанатты жиын студенттердің шығармашылық концертімен жалғасып, қонақтарға көтеріңкі көңіл-күй сыйлады.

Дәл осы күні университеттің Педагогика және психология факультетінде ұлт ұстазы Ахмет Байтұрсынұлы атындағы дәрісхананың ресми ашылу рәсімі өтті. Шараға университет ректоры Болат Тілеп, Ахмет Байтұрсынұлының ұрпақтары, Ахмет Байтұрсынұлы атындағы музейдің жетекшісі Райхан Имаханбет бастаған музей қызметкерлері және оқытушы-профессорлар құрамы қатысты.

Салтанатты жиында Болат Тілеп құттықтау сөз сөйлеп, Ахмет Байтұрсынұлының 1928-1929 жылдары дәл осы университет қабырғасында қызмет еткенін ерекше атап өтті. Қонақтар оқу ордасына ұлт ұстазының 150 жылдық мерейтойына орай жарық көрген «Ахмет Байтұрсынұлы. 12 томдық шығармалар жинағының» қазақ және орыс тілдеріндегі нұсқаларын, сондай-ақ Райхан Имаханбеттің «Ғасыр саңлағы» атты еңбегін тарту етті.

Шара соңында университет ректоры бірінші курс студенттеріне арнап қоғамдық дәріс оқып, жаңа оқу жылының мазмұнды басталуына жол ашты.

02.09.2025

Ақпарат көзі: qamshy.kz