QS САММИТІ ӨЗ ЖҰМЫСЫН БАСТАДЫ

Бүгін Корея Республикасының астанасы Сеул қаласындағы Korea университетінде Азия-Тынық мұхиты аймағындағы жоғары білім беру саласындағы ең ірі оқиғалардың бірі – «QS Higher Ed Summit: Asia Pacific – 2025» саммиті өз жұмысын бастады. Бұл маңызды жиынға әлемнің зор қызығушылығын танытып отырған өңірі саналатын Азия аймағынан 1200-ден астам делегат қатысып жатыр. Оның ішінде Абай атындағы ҚазҰПУ Басқарма төрағасы-Ректор Болат Тілеп бастап барған университет делегациясы да бар.

Саммиттің ашылуында БҰҰ-ның бұрынғы Бас хатшысы Пан Ги Мун сөз сөйлеп, «Білім – жаһандық ынтымақтастықтың, инновация мен жауапкершіліктің негізі» екенін баса айтты. Ол университеттерде сыни ойлау, жанашырлық пен жаһандық азаматтық ұстаным дамуы қажет екендігіне назар аудартты. Білімнің ұлттар мен ұрпақтарды біріктіретін көпір рөлін атқаратынын жеткізген Пан Ги Мун өз сөзінің қорытындысында 1962 жылы айтқан Джон Кеннедидің «Шекарадан асып, көмек қолыңды соз» деген әйгілі сөзін келтірді.

Саммиттің ең әсерлі сәттерінің бірі – халықаралық Хитачи компаниясының өкілі, доктор Кацуо Яноның жасанды интеллект (ЖИ) тақырыбындағы баяндамасы болды. Ол сөз барысында жасанды интеллектінің мүмкіндіктерін нақты мысалдармен көрсетіп, сахнада тікелей ЖИ арқылы жасалған және жүргізушінің дауысын дәл қайталаған сұхбат үлгісін таныстырды. Бұл туралы саммиттің ресми ашылу салтанатына арнайы делегацияны басқарып барған Абай атындағы ҚазҰПУ Басқарма төрағасы-Ректор Болат Әнапияұлы:

– Kazuo Yano – әлемде тұңғыш рет квантты алгебра негізінде ойға ой қосатын жасанды интеллектіні жасап шығарған және ең маңыздысы оны адамның мінез-құлқымен байланыстыра білген ғалым. Жанды интеллект үшін яки адамзат үшін жасанды интеллект тек ғылыми-техникалық және мәдени-гуманитарлық прогрестің көзі ғана емес, нағыз бақыттың базынасы деп түсінеді. Ол ЖИ-ді «тарихи сананың төңкерісі» деп бағалайды. Сөз жоқ, ойының астарын түсінген жанды бұл талай жерге жетелейді, – дейді.

Абай университеті қазірде білім беру саласына жасанды интеллектіні енгізуді жан-жақты қарастырып, педагогика саласында пайдалану тетіктерінің әдістемесін дайындады. Сондықтан, мұндай ірі халықаралық саммит қара шаңырақтың оқытушы-профессорлар құрамы үшін аса маңызды. Бағдарлама аясында ҚазҰПУ делегациясы жоғары білім беру саласындағы көшбасшылық, «жасыл» таланттарды дамыту, сондай-ақ «QS analytics» платформасының талдау құралдары жөніндегі панельдік сессияларға қатысты.

Күннің ең көп күткен әрі салтанатты сәті – «QS Asia WUR – 2026» рейтингі нәтижелерінің жариялануы болды. Бұл халықаралық рейтингте Абай атындағы ҚазҰПУ биыл мәртебелі 138-орынды иеленгенін айта кетуіміз керек. Соңғы төрт жылдың көлемінде Абай университеті Азияның ең үздік 150 жоғары оқу орнының қатарына тұрақты түрде еніп, өзінің берік позициясын және оң даму динамикасын дәлелдей алды. Алдағы уақытта Қазақстан мен Орта Азиядағы педагогикалық ЖОО-лардың ішіндегі көшбасшы – ҚазҰПУ өз орнын нықтай түсетіні даусыз.

«Азия‑Тынық мұхиты аймағындағы бірнеше ұрпақтың әлеуетін дамыту: дағдылар мен серіктестіктер» тақырыбына арналған саммит аясындағы бұдан өзге де ең қызықты ақпараттарды алдағы күндері хабарлап отырмақпыз.

Абай атындағы ҚазҰПУ
Баспасөз қызметі