СОРБОННА-ҚАЗАҚСТАН ИНСТИТУНЫҢ ДИРЕКТОРЫ «ПАЛЬМА» ОРДЕНІМЕН МАРАПАТТАЛДЫ

Абай атындағы Қазақ ұлттық педагогикалық университетінің Сорбонна-Қазақстан институтында Академиялық Пальмалар орденін тапсыруға арналған салтанатты рәсім өтті. Бұл жоғары марапат Институт директоры, ҚР Президенті жанындағы Адам құқықтары жөніндегі комиссия төраға орынбасары Айнұр Сабитоваға берілді. Орденді Франция Президентінің атынан Қазақстандағы Француз Республикасының Төтенше және Өкілетті Елшісі Сильван Геоге табыстады.

Марапаттау рәсімінде ҚР Ғылым және жоғары білім министрі Саясат Нұрбек арнайы бейнеқұттықтау жолдады. Онда министр Франция мемлекетінің білім-ғылым, зерттеу саласы бойынша Қазақстанның ең маңызды әріптестерінің бірі екенін жеткізіп, елімізде ашылған Сарбонна-Қазақстан институтын осындай өзара әрекеттестіктің жарқын мысалы ретінде келтірді.

– Бұл жоба – француз жоғары білімінің Орталық Азия мен Қазақстандағы ең бірінші алаңы және екі мемлекет арасындағы жоғары дәрежелі әріптестіктің айқын дәлелі саналады. Франция тарапының елімізді әлемдік білім кеңістігіне ықпалдастыру бағытындағы Мемлекет басшысы Қасым-Жомарт Кемелұлы Тоқаев айқындап берген шетелдік жетекші университеттер филиалдарын Қазақстанда ашуға бағытталған міндеттерді жүзеге асырудағы маңызды рөлін ерекше атап өткім келеді. Абай атындағы Қазақ ұлттық педагогикалық университеті базасында Сарбонна-Қазақстан институтының ашылуы халықаралық ынтымақтастықты кеңейтуге, жоғары білім сапасын арттыруға, педагогикалық білім берудің жаңа үлгілерін тартуға және елімізде француз тілінің қолданылу аясын кеңейтуге бағытталған маңызды қадам болды» – деді ҚР Ғылым және жоғары білім министрі Саясат Нұрбек.

Сонымен қатар, профессор Сәбитованың еңбегіне тоқталған Саясат Нұрбек Француз Республикасының өкілдеріне министрлік атынан қазақстандық ғалымдардың еңбегіне жоғары баға бергендері үшін ризашылығын білдірді.

Салтанатты марапаттау рәсімінде Абай атындағы ҚазҰПУ Басқарма төрағасы-Ректор Болат Тілеп Қазақстан жоғары білім беру саласындағы Сарбонна-Қазақстан институтының қызметіне тоқталып, ҚР-дағы Францияның Төтенше және Өкілеті Елшісі Сильван Геогеге алғысын айтты. Болат Анапияұлы Сарбонна-Қазақстан институтының директоры Айнұр Әлімханқызының Франция жоғары дәрежелі марапатына толық лайық екенін жеткізіп, оның Франция мен Қазақстан арасындағы ғылым-білім саласындағы байланысқа қосқан үлесіне тоқталды. Сондай-ақ басқосудың қадірлі қонақтары – ҚР Сыбайлас жемқорлыққа қарсы іс-қимыл агенттігінің экс-төрағасы Алик Шпекбаев, ҚР СІМ Алматы қаласындағы Өкілдігінің басшысы-Арнайы тапсырмалар жөніндегі елші Жәнібек Әбдрашов, Франция Елшілігінің өкілдері елші-кеңесші Себастьен де Куртуа, Алматыдағы Бас Консул Максим Жерэнже, «Франция-Қазақстан» Сауда-өнеркәсіп палатасының бас директоры Аньес Буссе, т.б. сөз сөйлеп, профессор Айнұр Сабитованың академиялық қызметі мен білім саласындағы еңбектерін ерекше атап өтті.

Айта кетсек, Францияның ең байырғы наградаларының бірі саналатын Академиялық Пальмалар ордені 1955 жылы ресми түрде бекітілген. Ол білім саласының үздік өкілдеріне, Францияның ұлттық білімін дамытуға және француз мәдениетінің әлемге таралуына үлес қосқан азаматтарға беріледі. Сонымен қатар, шетелдік азаматтарға Франциямен университетаралық және ғылыми ынтымақтастықты дамытудағы еңбегі үшін де тапсырылады. Қазақстанда бұл орден 1996 жылдан бері табысталып келеді.

Абай атындағы ҚазҰПУ

Баспасөз қызметі