ШЕТЕЛДІК ҒАЛЫМДАР ХАЛЫҚАРАЛЫҚ КОВОРКИНГ ӨТКІЗДІ

Абай атындағы Қазақ ұлттық педагогикалық университетінде Гонконг Білім беру университетінің профессорларының қатысуымен «Жасанды интеллект дәуіріндегі инклюзивті білім беру: педагогтер үшін инновациялар мен сын-қатерлер» атты халықаралық коворкинг өтті. Шара инклюзивті білім беру жүйесіне жасанды интеллект технологияларын тиімді енгізу, педагогтерге арналған заманауи әдістерді үйрету мақсатында ұйымдастырылды.

Жиынды Академиялық қызмет жөніндегі проректор Бану Нарбекова ашып, Президент Жолдауында көтерілген жасанды интеллектті ұлттық деңгейде дамыту жөніндегі тапсырмалардың орындалуына ерекше тоқталды. Оның айтуынша, цифрлық дәуірде педагог кадрлардың дайындығын жаңа талаптарға сәйкестендіру қажет болғандықтан, халықаралық тәжірибе алмасуға арналған мұндай алаңның өткізілуі өте өзекті.

Коворкингте Гонконг Білім беру университетінің профессоры Яньцзэ Сун ерекше білім беру қажеттіліктері бар оқушылардың эмоционалдық саулығын жақсартуға бағытталған жасанды интеллектке негізделген тәсілдер туралы баяндама жасады. Ол халықаралық тәжірибеде тиімділігі жоғары смарт-жилет технологиясын таныстырып, құрылғының жұмыс принципін егжей-тегжейлі түсіндірді. Профессордың айтуынша, смарт-жилет баланың эмоционалдық күйін сенсорлар арқылы бақылайды. Мазасыздану немесе күйзеліс деңгейі көтерілген жағдайда жасанды интеллект алгоритмдері арқылы тәрбиешіге хабарлама жібереді. Құрылғының вибрациялық немесе қысымдық жеңіл әсер беру арқылы баланы тыныштандыруға көмектесетін қосымша мүмкіндігі аутизм спектрі бұзылыстары бар балалардың оқу процесіне бейімделуін қолдайды. Смарт-жилет инклюзивті білім беру ортасында оқушының жағдайын нақты уақыт режимінде қадағалап, оқытуды жекелеуге мүмкіндік беретін инновация ретінде жоғары бағаланды.

Ал коворкингте Гонконг Білім беру университетінің қауымдастырылған профессоры Юэнь Чи Пун да шулы ортада кішкентай балалардың тыңдау қабілетін бағалаудың ғылыми негіздерін түсіндіріп, дыбысты ажырату сапасын анықтаудың оқыту үдерісіндегі маңызын айтты. Ғалым заманауи аудиологиялық технологиялар мен жасанды интеллекттің дыбыстық ақпаратты талдаудағы артықшылықтарын мысалдар арқылы көрсетті.

Сондай-ақ, жиында отандық мамандар да өз еңбектерін ұсынды. Олардың ішінде Абай атындағы ҚазҰПУ, ҚазҰҚПУ, SDU ғалымдары бар. Мәселен, Абай университетінің докторанты Юлдуз Иминова playful learning әдістерін жасанды интеллектпен ұштастыру арқылы балаларды қауіпсіздік ережелеріне үйретудің жаңа мүмкіндіктерін таныстырды.

Коворкинг мектепке дейінгі ұйым тәрбиешілерін даярлау жүйесіндегі қазіргі «альфа-буынының» ерекшеліктеріне сәйкес, тәрбиешілердің кәсіби құзыреттілігі смарт ойындар мен цифрлық құралдарды тиімді қолдану қабілетімен толықтырылуы тиіс екенін нақтылады. Ол педагог тек дәстүрлі біліммен шектелмей, технологиялық ойлау мен ақпараттық сауаттылықты қатар меңгеруі қажет.

Абай атындағы ҚазҰПУ

Баспасөз қызметі