«Қазақстанды кітап оқитын елге айналдыру» тақырыбындағы кездесу өтті

2024 жылдың 24 қазанында Абай университетінде Мансап орталығы мен Teach for Qazaqstan қорының ұйымдастыруымен жазушысы, блогер және kitapal.podcast жобасының резиденті Данияр Жігітбекпен кездесу өтті. Кездесу «Қазақстанды кітап оқитын елге айналдыру» тақырыбында өрбіді. Кездесу барысында Данияр Жігітбек заманауи мәселелерді қозғай отырып, кітап оқу мәдениетінің маңыздылығын ерекше атап өтті. Сондай-ақ, кітап оқудың жаңа стандарттарын қалыптастырудың қажеттілігін түсіндіріп, осы бағыттағы өзінің жеке тәжірибесін бөлісті. 

Кездесу барысында Данияр Жігітбек өз өмір жолынан мысалдар келтіріп, қалай кітап оқу арқылы өзін-өзі дамытуға және шабыттануға болатынын көрсетті. Ол кітаптарды тек білім көзі ретінде ғана емес, өмірлік серік, тіпті жетістікке жету құралы ретінде қарастыруға шақырды. Студенттер бұл кездесуде белсенділік танытып, Данияр Жігітбекке көкейдегі сұрақтарын қойып, өз ойларымен бөлісті. Кітап оқу - адамның ой-өрісін кеңейтіп, жаңа мүмкіндіктер ашатыны туралы пікірлер аудиторияның үлкен қолдауына ие болды. Кездесу барысында ең белсенді студенттер Teach for Qazaqstan қорының арнайы сыйлықтарымен марапатталды. Бұл студенттерге ерекше жігер беріп, оларды алдағы уақытта да белсенді болуға ынталандырды.

Кездесу - кітап оқу арқылы өзін-өзі дамытуға шабыт берген, жастарды жаңа биіктерге жетелеген маңызды шара болды. Студенттер өз болашақтарына деген сенімдерін нығайтып, оқу мен дамудың жаңа қырларымен танысты. 

Айта кетейік, Данияр Жігітбектің Kitalal, kitapalclub, kitapal.podcast және auylga.kitapal жобалары жастар арасында және кітапсүйер қауымға өте танымал.