«Шизофрения кезіндегі когнитивті процестер: қазіргі зерттеулер және клиникалық тәжірибе» практикалық семинары

2025 жылғы 12 наурызда «Шизофрения кезіндегі когнитивті процесстер: қазіргі зерттеулер және клиникалық тәжірибе» атты практикалық семинар өтті. Практикалық семинарды жалпы және қолданбалы психология кафедрасының қауымдастырылған профессор м.а. Гулжанар Бекмұратова және «7М03112 - Психотерапия негіздерімен клиникалық психология» мамандығының магистранттары Гүлжан Амангельдинова мен Жұлдық Төлеу ұйымдастырды. Практикалық семинардың негізгі спикері ретінде Швециядан келген клиникалық психолог және зерттеуші - Мэйсан Эриксдоттер болды.

Практикалық семинардың өткізілу барысында қатысушылар шизофрениямен ауыратын науқастардағы әлеуметтік когницияның негізгі аспектілерін, сондай-ақ оны аутизм спектрінің бұзылыстарымен салыстырды. Ғылыми әдебиеттердегі терминологиялық түсініксіздік пен осы науқастардағы когнитивті бұзылулардың диагностикасының күрделілігі талқыланды. Сонымен қатар, спикер осы саладағы бар зерттеулердің әдіснамалық шектеулерін қарастырып, оларды еңсерудің ықтимал жолдарын ұсынды.

Семинардың негізгі сәттерінің бірі когнитивтік бұзылуларды емдеудің практикалық тәсілдеріне арналған пікірталас болды. Науқастардың әлеуметтік бейімделуін жақсартуға бағытталған заманауи емдеу әдістері және осы саладағы болашақ ғылыми зерттеулердің келешегі талқыланды.

Іс-шараға жалпы және қолданбалы психология кафедрасының профессор-оқытушылар құрамы, атап айтқанда профессор Алма Акажанова, Ольга Тапалова, қауымдастырылған профессор Эльмира Абишева, 8D03105 - Психология, 8D03117 - Клиникалық және әлеуметтік психология, 7М03122 - Клиникалық психология психотерапия негіздерімен, 7M03118 - Денсаулық психологиясы және психотерапия негіздері мамандықтарының магистранттары мен докторанттары қатысты. Практикалық семинар қатысушыларға когнитивті психология саласындағы білімдерін тереңдетуге және шизофрения кезіндегі когнитивті бұзылуларды зерттеу мен емдеудің заманауи әдістері туралы түсініктерін кеңейтуге мүмкіндік берді.