АБАЙ УНИВЕРСИТЕТІ – МӘҢГІ ЖАСТЫҚТЫҢ МЕКЕНІ

Абай университеті – тек сабақ пен сессиядан ғана тұрмайды. Қасиетті қарашаңырақ студенттің жан-жақты дамуына, көшбасшылық қабілеті пен шығармашылық әлеуетінің артуына, бір сөзбен айтқанда өзін-өзі табуына арналған үлкен мектеп. Мұнда әрбір жас жігерін шыңдап, бос уақытын тиімді өткізеді, шығармашылықпен айналысып, қоғамға пайдалы іспен айналыса алады.

Қазіргі таңда университет қабырғасында 48 студенттік ұйым мен клуб жұмыс істейді, олардың қатарында ғылыми, шығармашылық, спорттық, еріктілік және медиа бағытындағы бірлестіктер бар. Әр факультет өз бағытына сай түрлі жобаларды жүзеге асырып, жастардың қызығушылығын дамытып отырады.

Мәселен, студенттер арасында еріктілік мәдениеті ерекше дамыған. «Мейірім», «Береке», «Ниет», «Senim», «Аяла» және «OzgertSen» сияқты ұйымдар жүздеген жасты біріктіріп, қайырымдылық пен әлеуметтік бастамаларды іске асырады. Олар балалар үйі мен қарттар үйіне көмек көрсетіп, экологиялық және инклюзивті жобаларға атсалысып келеді.

Ал шығармашылық бағыттағы клубтар да студенттердің өміріне ерекше рең беретіні сөзсіз. «Diamond», «Гакку», «Dem dance», «Alau» би топтары мен «Abai music», «Auez Band» музыкалық клубтары, «Алаш оркестр» ансамблі, «Visage» модельдік клубы және «Бейне» сурет студиясы жастардың эстетикалық талғамын дамытып, сахна мәдениетін қалыптастырады. Ал «Үркер» және «Өмір» студенттік театрлары сахналық өнерге баулып, актерлік шеберлікті ұштайды.

Медиа мен журналистика саласына қызығатын студенттер үшін «Filmedia», «Қаламгер» және «Student’s mass media» клубтары үлкен мүмкіндіктерді ұсынады. Мұнда жастар жаңалық дайындап, репортаж жасап, заманауи ақпараттық құралдармен жұмыс істеуді үйренеді, сол арқылы көптеген талантты журналистер мен контент-мамандар тәрбиеленеді.

Ғылым мен логикалық ойлауды дамыту бағытында «Abai Robo» робототехника клубы, «Garde» шахмат клубы және «Кітап-time» интеллектуалды алаңы жұмыс істейді, олар студенттердің ғылыми-зерттеу, аналитикалық және стратегиялық ойлау дағдыларын жетілдіреді.

Университетте спорт та жоғары деңгейде дамыған. «Phoenix» және «Otyrar» футбол клубтары, «Айбын» спорт ұйымы студенттерді белсенді өмір салтына үндейді, әрбір жас денсаулықты нығайтып қана қоймай, командалық рух пен достықтың қадірін сезінеді.

Тіл үйрену мен халықаралық бағытқа қызығушылар «Жас дипломаттар», «Speaking club», «Француз тілі» клубтары арқылы қабілеттерін кеңейтеді. Бұл ұйымдар студенттерді мәдени көпір болуға, шет тілін жетік меңгеруге және әлемдік деңгейде ойлауға баулиды. Сонымен қатар, университет көлемінде жұмыс істейтін «Атамекен» дебат клубы, «Жастар рухы» саяси жастар ұйымы және «Өрлеу» университетаралық байланыс клубы студенттердің көшбасшылық қасиеттерін дамытып, қоғамдық белсенділікті арттыруға зор үлес қосады.

Абай университетіндегі студенттік өмір – шығармашылық пен ғылымның, еріктілік пен спорттың, мәдениет пен азаматтық белсенділіктің үйлесім тапқан кең өрісі. Мұнда әр білім алушы өзінің қабілетіне сай арманға құлаш сермеп, қоғамға пайдалы тұлға болып қалыптаса алады.

Абай атындағы ҚазҰПУ

Баспасөз қызметі