ҚазҰПУ-да «Академиялық жазудың ерекшеліктері» тақырыбында ғылыми-әдістемелік семинар өтті

2025 жылдың 7 сәуірінде Абай атындағы Қазақ ұлттық педагогикалық университеті Педагогика және психология факультетінің педагогика кафедрасы «Академиялық жазудың ерекшеліктері» атты ғылыми-әдістемелік семинар ұйымдастырды.

Іс-шараны кафедра меңгерушісі, педагогика ғылымдарының кандидаты Шолпан Колумбаева ашып, академиялық жазудың білім беру және ғылыми қызметтегі маңыздылығына тоқталды. Ол ЖОО оқытушылары, докторанттар, магистранттар мен студенттер үшін академиялық сауаттылық пен жазу дағдыларының кәсіби дамудағы рөлін атап өтті.

Семинардың мақсаты - қатысушыларды академиялық жазудың негізгі ерекшеліктерімен таныстыру және ғылыми мәтіндерді құрылымдау дағдыларын дамыту.

Семинар барысында келесі мәселелер кеңінен талқыланды:
• Академиялық жазудың мәні, маңызы, түсінігі және түрлері;
• Академиялық мәтіндердің анықтамасы мен негізгі сипаттамалары;
• Ғылыми және білім беру қызметіндегі академиялық жазудың орны мен рөлі;
• Академиялық жұмыстардың түрлері: реферат, курстық жұмыс, дипломдық жұмыс, диссертация.

Семинар ЖОО оқытушылары мен жас ғалымдар тарапынан қызу талқыланып, қатысушылар ұйымдастырушыларға алғыстарын білдірді. Шара аясында академиялық жазудың ғылыми және практикалық аспектілері атап өтілді.

Іс-шараға 50-ден астам жоғары оқу орындарының оқытушылары, докторанттар, магистранттар мен студенттер қатысты.