АБАЙ УНИВЕРСИТЕТІ МЕН PHIHUA БІЛІМ БЕРУ КОМПАНИЯСЫ МЕМОРАНДУМҒА ҚОЛ ҚОЙДЫ

Бүгін Астанада Президент Қасым-Жомарт Тоқаевтың қатысуымен халықаралық «Қазақстан – академиялық білім аумағы» атты стратегиялық серіктестер форумы өз жалғасын тапты. Форумы аясында Абай атындағы ҚазҰПУ мен Hongkong PHIHUA Education Limited компаниясы өзара ынтымақтастық туралы меморандумға қол қойды.

Форумға алыс-жақын шетелден келген үздік шетелдік университеттердің жетекшілері, халықаралық рейтинг және аккредиттеу агенттіктерінің өкілдері қатысты. Атап айтар болсақ, Quacquarelli Symonds компаниясы, Мәскеу мемлекеттік халықаралық қатынастар институты, Бейжің тіл және мәдениет университеті, Кардифф университеті, Вусонг университеті, МИФИ, Минерва университеті және тағы басқа да әлемнің жетекші жоғары оқу орындары мен өкілдері. Олардың қатарында Орта Азия мен Қазақстан бойынша педагогикалық көшбасшы университет – Абай атындағы ҚазҰПУ да бар.

Халықаралық іс-шара жоғары білім мен ғылым саласындағы тәжірибе алмасу, жаһандық үрдістерді талқылау және бірлескен шешімдер қабылдау үшін маңызды алаңға айналғанын айта кету керек. Онда шетелдік және отандық ЖОО-лар мен ғылыми-зерттеу ұйымдарының басшылары, жаһандық сарапшылар цифрландыру, академиялық ұтқырлық және технологиялар трансфері мәселелерін талқылады.

Форумда сөз сөйлеген Мемлекет басшысы Қасым-Жомарт Тоқаев: «Мықты университеттер – келешектің фабрикасы. Бұл жерде идеялар туып, кедергілер еңсеріледі. Әділ әрі үйлесімді әлемнің алғышарттары қалыптасады. Жоғары оқу орындары халықтар арасындағы сенім мен ынтымақты күшейтіп, дипломатия құндылықтарын дәріптейді. Университет қабырғасында қалыптасатын студенттер бауырластығы, зерттеушілер қоғамдастығы және академиялық серіктестік тек ғылым-білім саласында емес, экономика мен қоғамдық өмірдегі, тіпті саясаттағы өзгерістерге қозғау салады», – деді.

Президенттің айтуынша, қазіргі уақытта еліміздің жоғары оқу орындарында 31 мыңнан астам шетел студенті білім алады. Бұл – қазіргі сәтте Қазақстан үшін рекордтық көрсеткіш. 2029 жылға қарай аталған межені 100 мыңға дейін жеткізу көзделіп отыр. Ол үшін виза режимі оңтайландырылып, шетелдіктердің алаңсыз білім алуына барынша қолайлы жағдай жасалмақ.

Жиында ҚР Жоғары білім және ғылым министрі Саясат Нұрбек, Quacquarelli Symonds (QS) компаниясының президенті Нунцио Квакварелли, Мәскеу мемлекеттік халықаралық қатынастар институтының (МГИМО) ректоры Анатолий Торкунов, Бейжің Тіл және мәдениет университетінің президенті Пэн Дуань, Cardiff University президенті Венди Ларнер, Woosong білім беру қоры қамқоршылық кеңесінің төрағасы Ким Сонг Кёнг, Мәскеу ұлттық ядролық зерттеу университетінің ректоры Владимир Шевченко, Minerva University президенті Бен Нельсон, Баку мемлекеттік университетінің ректоры Эльчин Бабаев сөз сөйледі.

Әлемнің жетекші университеттерімен стратегиялық әріптестік – білім сапасын арттырып, адами капиталдың әлеуетін нығайту жолындағы ерекше мүмкіндік екені сөзсіз. Осыған орай, халықаралық форум аясында қазақ білімі мен ғылымының қарашаңырағы, еліміздің тұңғыш университеті Абай атындағы ҚазҰПУ Қытайдың Hongkong PHIHUA Education Limited компаниясымен ынтымақтастықты нығайтуға бағытталған меморандумға қол қойды.

– Қазіргі уақытта, Абай университеті әлемнің 160-тан астам жетекші жоғары оқу орнымен әріптестік ынтымақтастық орнатқан. Халықаралық аренада академиялық ұтқырлық бойынша тәжірибе алмасу жолында табысты жұмыс істеп келеді. Қытайдың Hongkong PHIHUA білім беру компаниясымен жасалған меморандум халықаралық серіктестігімізді дамытып, студенттердің білімін жетілдіруге ықпал етеді деген сенімдемін, – дейді Абай атындағы ҚазҰПУ Басқарма төрағасы-Ректор Болат Анапияұлы.

Қазақстан мен Қытай арасындағы білім беру саласындағы ынтымақтастықты тереңдету мақсатында ҚР Ғылым және жоғары білім министрлігінің келісімімен «Халықаралық білім беру мектебін» құруға уағдаласты. Құжат екі жақты студенттердің білімін жетілдіруге, тәжірибе алмасуға мүмкіндік бермек. Сонымен қатар, оқу-әдістемелік инфрақұрылымды жақсарту мен Қазақстан-Қытай арасындағы білім беру ынтымақтастығын жан-жақты дамыту көзделген.

Абай атындағы ҚазҰПУ

Баспасөз қызметі